في ذكرى رحيل الكبير كاظم اسماعيل گاطع وقصيدة رثاء
خيالك فرس
جامح يركض ويه الريح
مامسروج ظهره ً...
ولابحلگه اعنان .
فرس بري ...
وصهيله تسمعه من كل صوب
هلهولة عرس
وتفزز النعسان .
أله بكل ديره حافر...
وعله مد الشوف
من يغير يخطف...
مثل خطف الجان .
لو هب الهوى ...
ويحلاله ركض الليل
لعبه ومشتهاته ...
يطارد الغزلان .
خيالك ياخيالك...
ماتكضه حدود
يعبرلك الدنيه ...
وبعده ماتعبان .
يتّبع مسير الماي...
وين يروح
يبدي من المنابع...
لاخر النهران .
ويتنطر طلوع الشمس
تالي الليل
من تفك حزنها...
وتلبس الالوان .
چم مره غسل...
وجهه بمطر اًذار
چم مره تكحل...
من گمر نيسان .
چم مره شكل گلبه
بجنح عصفور
وعرف شنهي الطيور
ورفة الجنحان .
وعرف شنهي الي مابين
الفرح والخوف
وعرف وكت العصر
شتگول من تگوطر الغربان
خيالك يا خيالك طير
رد وكت الغروب...
الوحشة البستان .
وبعشها البلابل ...
شافها من تنام
مابين الاشجار ...
وزحمة الاغصان .
تلتم البعضها...
خايفه من الليل .
عفية الليل حته اعله
البلابل حاكم وسلطان .
ولاچنها الصبح
تملي الهوى تغريد
خرسه ويه الشجر
چنها بلايه اللسان .
وللشاعر سوالف
مايلمها البال
وسفرات ومواويل
وغنه وألحان
انه الشفته اخذ...
بلمه وغبش للهور
ضاگ الماي شم ريحة
البردي ولامس الگطان
وسولفله السمچ...
والهور عن كلشي
عن برديه صفره
ملحگه عالطوفان
عن الناس عن الماي
عن هاي الارض
شنهي واصلها شچان .
خيالك يبن گاطع
ماگطع مشوارالا وجاب
من ذاك السفر نيشان .
مودم مو لحم ...
چن من شعر مخلوق
من صوره وحلم
من قافيه واوزان .
من نار وثلج
من بحر من اسرار
من نجمه وسمه
من عاصفه وبركان .
قرينالك قصايد
من غميج الروح
شاتلهن شتال
بدفتر اسنينك .
قصايد شايله شگد
ماحزن بالناس
وتصاوير الجرحها
بكل دواوينك .
قرينالك حچي
( بلون البچي الراكد بعين الناس)
وبگد الهموم البينها وبينك .
قرينالك ( شمس بالليل )
ياشمس الاشعار
الغافيه بعينك
وحلمنه ( بچنه نحلم )...
( وبعشك نيسان )
( وعله جناح الفخاتي...
الطايحه من اشجار محترگه)
( لگينه اخبار عامل طاح ...
بس مات گلبه وماگًدر...
كل الرصاص الحار...
يزرف بدلته الزرگه )
وحنه زغار... وحنه زغار
دگ بينه الرصاص الحار .
وحفضنالك قصايد بالگلب
تلهب لهيب النار .
لگط لون الحزن بيها ...
ومواويل الجنوب
وكل جرح محتار .
( رسالة أم ) بعدهي تنوح ...
وتنزل عالضمير
وتاكله بمنشار .
وعلى ( سفرة مجانين)
الشعر جن بيك
ياكاظم وعقله اندار .
متگلي مفاتيح السوالف
حصلتها منين
وشهل سحر ياسحار.
ياتاجر ولايوم ...
طلعت خسران
وبسوگ الشعر
ياما افلسوا تجار .
يامتحف صور كل
صورة شكل ولون
ماتعبن عيونك ؟ تعبوا الزوار .
بسامير شكثر...
دگيت الك بالروح
لان كل صورة يحتاج
اله ادگ بسمار .
وخطيتي برگبتك
ياكاظم اسماعيل
انت اول درب
جر رجلي عالاشعار .
طالب الدراجي