ديفيد هيوم والادراكات الحسية (الحلقة الأولى)

  • 10 - 07 - 2021
  • 348
-ديفيد هيوم : هو فيلسوف إسكتلندي ظهر في القرن الثامن عشر ، هذا الفيلسوف يگول : ماكو لا مادة ولا عقل بالوجود ..

-چا شكو ؟

-يگول : أكو مجموعة إحساسات لا غير ؛ يعني كلشي يجينه عن طريق الحواس أو عن طريق العقل ، هذا كله عبارة عن إحساسات لا غير ..

-شلون يعني ؟

-شوف : معرفتنه كلهه سواء كانت حسية أو عقلية ، مصدرهه الوحيد هو الحواس ، والعقل ما إله أي دور بتكوين المعرفة إللي تجينه من الحواس ..

-يعني قصدك إنو العقل مثل العجينة يتشكل حسب الشي اللي داخل إله عن طريق الحواس ، وهو لايتحكم أويربط بين الأشياء والأمور اللي ندركهه بالحواس ، صحيح ؟

-إي صحيح ، فالعقل قابل وليس فاعل ؛ يعني فقط يستقبل إحساسات بدون أن يفعل بيهه أي شي ..

-اي وبعدين ؟ 

-يقسم هيوم هاي الإدراكات الحسية إلى قسمين ..

-لحظة لحظة .. عود شنو معنى الإدراكات الحسية ؟ 

-شوف : هاي البرتقالة اللي گدامك ، إنت تشوف لونهه ، وتشتم ريحتهه ، وتحس بملمسهه ، وتتذوق طعمهه ، جيد ؟

-جيد واضح ، وبعدين ؟

-هاي الصفات قبل لا تجي للعقل چانت مجرد إحساسات مشتتة متفرقة مايربطهن أي شي ، بعدين العقل عندما يربط بيناتهن ويوحدهن ويجمعهن سوه ، راح يكون عدنه شي واحد من مجموع هاي الصفات ، نسميه برتقالة ، وهذا الشي هو الإدراك الحسي ..

-يعني قصدك ، أن الإدراك الحسي يتكون عندما يربط العقل بين الصفات المتناثرة ويوحدهن بشي محدد ، أما قبل هذا الشي فماكو غير إحساسات متفرقة ، صحيح ؟

-نعم صحيح ..

-جيد هسه كمل شنو أقسام الإدراكات الحسية ؟

-تنقسم الإدراكات الحسية عند هيوم الى قسمين : الآثار الحسية والأفكار ، وإثنينهم نفس الشي ، بس الآثار الحسية أقوى بالعقل من الأفكار ..

-شلون ؟

-يعني عندما تحط إيدك بالنار ، راح تنلسع وتگوم تگمز ، هاي النتيجة يسميهه هيوم آثار حسية وهي قوية وواضحة جدا عند العقل ، واضح ؟ 

-واضح.. 

-بعد كم سنة عندما تتذكر هاي اللسعة ، راح يحضر عندك الموقف بس بصورة ضعيفة ؛ لان حضر عندك على شكل فكرة مو لسعة حقيقية ..

-إذن على هذا الكلام ، تكون الإدراكات الحسية نفس النوع ، بس الإختلاف بدرجة القوة والوضوح ، صحيح ؟

-صحيح ، فمادام الأفكار ماتصير وتتكون إلا عندما تكون عدنه أشياء نحس بيهه ، إذن مصدر الأفكار هو الحس لا غير ..

-زين ..بهالحالة شلون نعرف إنو هاي الفكرة الموجودة بعقلنه ، صحيحة لو خاطئة ؟

-المرجع هو الآثار الحسية ، يعني إذا گدرنه نرجع الفكرة الى أصلهه الحسي فهي صحيحة ، أما إذا مالگينه إلهه أصل حسي فالفكرة خاطئة ..

 

#والحمد لله ..

 

#الفيلسوف_ديفيد هيوم ( الحلقة الأولى ) 

 

#باسم_الشبلاوي


اذا لم تظهر لك التعليقات فأعد تحميل الصفحة (F5)

مواضيع أخرى للناشر

العود.. الابدي عند نيتشة (الحلقة السادسة)

نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟
......المزيد

نيتشة والسلطة (الحلقة الخامسة)

-يگول نيتشه : يجب أن يكون الحكم والسلطة بيد الطبقة الارستقراطية
......المزيد

مات الإله.. عند نيتشة (الحلقة الرابعة)

إنتقد نيتشه الدين بصورة عامة ، وإنتقد الدين المسيحي بصورة خاصة ..
......المزيد

نيتشة والمرأة (الحلقة الثالثة)

يگولون : نيتشه چان يكره النسوان كلش ، ويموت منهن ، إلى درجة إنو فد مرة گال عن النسوان :
......المزيد

السوبر مان او الإنسان الخارق عند نيتشة (الحلقة الثانية)

-يؤمن "نيتشه" بنظرية التطور مالت دارون ، ويؤمن أن الإنسان الحالي تطور من كائنات أدنى منه مرتبة ، وإنو التطور
......المزيد

نيتشة والقوة (الحلقة الأولى)

-"نيتشه" : هو فيلسوف ألماني من فلاسفة القرن التاسع عشر ، عنده مجموعة مؤلفات ، من أشهرها كتاب "هكذا تكلم
......المزيد

نقد فلسفة شوبنهاور (الحلقة الحادية عشرة)

-يمكن توجيه بعض النقود لفلسفة شوبنهاور مختصرة كالآتي :
......المزيد

المنفعة الشخصية والعامة عند هيوم (الحلقة التاسعة)

-يعتقد "هيوم" إنو الخير والفضيلة هو مايحقق اللذة والمنفعة ، وإنو الشر والرذيلة هو مايسبب الألم وعدم المنفعة ، هذا
......المزيد