الخير والشر عند هيوم (الحلقة السابعة)
- شلون يعني ؟
- يعني ماكو شي هو خير أو فضيلة في ذاته ، والناس كلهه متفقة على إنو هذا الشي هو خير وفضيلة ، وماكو شي هو شر ورذيلة في ذاته ، والناس كلهه متفقه على إنو هذا الشي هو شر ورذيلة ؛ لا ماكو هيچ شي ..
-يعني هيوم يعتقد إنو ماكو خير وشر مطلقا ؟
-لا ، هيوم يعتقد إنو الخير والفضيلة أو الشر والرذيلة أمور موجودة ؛ ولكنها أمور نسبية ؛ يعني مايكون في نظرك خير وفضيلة ، ربما يكون في نظر غيرك شر ورذيلة..
-وشنو الضابطة في تحديد كون هذا الشي خير وفضيلة وبين كونه شر ورذيلة عند هيوم ؟
-الضابطة هي شعور اللذة أو الألم ؛ فكل شي يحققلك لذة فإنه خير وفضيلة بالنسبة إلك ، وكل شي يسببلك ألم فهو شر ورذيلة بالنسبة إلك ..
-يعني على هذا الكلام راح يكون تحديد كون الشيء خير وفضيلة أو شر ورذيلة هو من إختصاص المشاعر والعواطف ، صحيح ؟
-صحيح ..
-چا والعقل شنو دوره ؟ يعني العقل ماينطي رأي بقضية الخير والشر أو الفضيلة والرذيلة ؟
-العقل حتى لو إنطه رأي معين بالفضيلة والرذيلة ، فماراح يكون رأيه مسموع ؛ لأنو الإنسان يتبع عواطفه ومشاعره وأهواءه وليس عقله ..
-زين ، هنا عدنه سؤال يطرح نفسه ويتمرغل بالگاع وهو : معنى هذا الكلام إنو هيوم يتبع "مذهب اللذة الاناني" اللي يگول : إنو الخير هو اللذة اللي يحصل عليهه الفرد وليس المجتمع ، وإنو الشر هو الألم اللي يصيب الفرد وليس المجتمع ، فهل كان هيوم يتبع نفس هذا المذهب في اللذة والألم لو لا ؟
-لا ، فهيوم گدر يتجاوز هاي المشكلة ويجعل مذهبه عاما وليس فرديا في الخير والشر أو اللذة والألم ، من خلال مفهوم العاطفة والمشاركة الوجدانية مع الآخرين ..
- شلون يعني ؟
-راح نسولف عن هذا الموضوع بالمنشور القادم إن شاء الله ، ونوضح شنو معنى العاطفة والمشاركة الوجدانية مع الآخرين عند هيوم ..
والحمد لله ..
الفيلسوف_هيوم ( الحلقة السابعة )
باسم_الشبلاوي