نيتشة والسلطة (الحلقة الخامسة)

  • 27 - 07 - 2021
  • 1518
-يگول نيتشه : يجب أن يكون الحكم والسلطة بيد الطبقة الارستقراطية


..

-وشنو هي الطبقة الارستقراطية ؟

-هي مجموعة من العوائل اللي عدهم جاه وثروة وسلطة إجتماعية ، ويكونون محترمين ومهيوبين من الناس ، وهاي الطبقة إذا حكمت ، يكون حكمها وراثي ..

-خوش ، كمل ..

-فنيتشه يدعو إلى أن يكون الحكم بيد هاي الطبقة دون غيرها ..

-چا والديمقراطية شبيهه ، طلعت مو زينة ؟!

-يگول نيتشه : الديمقراطية ضررها أكثر من نفعها ؛ لأنو الديمقراطية هي اللي تحدد مصيرنا من خلال الانتخابات ، وهاي الانتخابات ، اللي يقوم بعملية الانتخاب بيهه هم الشعب ، اللي هوه في غالبيته متكون من ناس جهلة ، بسطاء ، أغبياء ، فراح يكون مصيرنه بيد هذوله الناس ، اللي عادة لا ينتخبون الشخص الكفوء أو النزيه او الصالح لقيادة المجتمع ؛ وإنما ينتخبون الأشخاص اللي يدغدغون مشاعرهم وعواطفهم وميولهم النفسية ، وهذا كله بسبب الديمقراطية .. 

-چا وين صار العدل والمساواة وتكافؤ الفرص ، اذا هوه يريد يخلي الحكم بيد طبقة خاصة من الناس ، وبعدين كل واحد يورث الحكم للي بعده ؟

-يگول نيتشه : يابه ياعدل يامساواة ؟! هاي كلهه كلاوات ومالهه أي صحة ؛ الطبيعة هي اللي فرقت بين الناس ، بحيث صار واحد قوي وذكي وجريء ، بينما صار واحد آخر ضعيف وغبي وجبان ، الصفات البشرية صفات طبيعية مانگدر نغيرهه ، والمفروض أن نحترم قرار الطبيعة ، بأن نخلي الشخص القوي في السلطة ، وأن الناس الضعفاء لازم يضحون و يفسحون الطريق للناس الأقوياء ، حتى القوي يشوف شغله بالحكم ، وبالتالي هاي الحكومة القوية ، راح تساعد في صناعة وتكوين الإنسان الخارق (السوبرمان ) ..

-شلون نيتشه يطلب من الناس العاديين أن يضحون بخياراتهم وطموحاتهم وآمالهم علمود الناس الأقوياء ؟! يعني هذا الشي مو يتناقض وي فلسفته اللي تدعو الناس إلى التحلي بالقوة والانانية وعزة النفس ، شلون يطلب منهم ويدعوهم إلى التضحية والإيثار ؟ شي مايشبه شي مو صحيح ؟! 

-اي صحيح ، بالإضافة إلى إشكالك هذا ، أكو اشكال آخر وهو : إن نيتشه يكول : إنو هاي الأخلاق اللي سائدة الآن بالمجتمع مثل العطف والتضحية والإيثار والرحمة وغيرهه ، هاي أخلاق مو زينة ، هاي أخلاق العبيد والضعفاء ، يعني الناس الضعفاء همه اللي اخترعو هاي الأخلاق ، حتى يتچفون شر وقسوة الاقوياء ؛ يعني الضعيف لأنه مايگدر يواجه القوي ، طلع حيلة حتى يتخلص من بطش القوي ، وهاي الحيلة هي الأخلاق اللي تدعو للتسامح والرحمة وغيرهه ..

-جيد جدا ، وشنو الأشكال ؟

-الإشكال هو : إذا أنت تگول إنو الضعفاء هم اللي أسسوا هاي الأخلاق ، فهذا معناه إنو الضعفاء فرضوا آراءهم على الاقوياء وخلوهم يقبلون بنظريتهم ، فذولة الضعفاء طلعو مو ضعفاء ، بالعكس طلعو أقوياء جدا ؛ لان گدروا يفرضون آراءهم على الاقوياء فرضا ، وهذا تناقض آخر من تناقضات فلسفة نيتشه بخصوص هذا الموضوع ..

 

والحمد لله ..

 

الفيلسوف_نيتشه ( الحلقة الخامسة)

 

باسم_الشبلاوي


اذا لم تظهر لك التعليقات فأعد تحميل الصفحة (F5)

مواضيع أخرى للناشر

إعادة المعدوم... ممكنة لو مستحيلة؟؟؟

-اكو بحث مطروح بين الفلاسفة والمتكلمين (علماء العقائد) ، وهو : هل يمكن ان يعاد الشي المعدوم ام لا يمكن
......المزيد

(البحت)

يسولفون على وحده زعلت ويه رجلها ..راد منها الزلمة يمعودة اتعوذي الشيطان گول ما رضت تبقه ومن الصبح صرت اهديماتها
......المزيد

تجربة سجن ستانفورد

من أغرب التجارب في التاريخ في دراسة أثارت جدلا واسعا،
......المزيد

الوجود.. والماهية ؟؟!!

-كل شي بالدنيا إله جهتين : وجود وماهية ، مثلا السماء إلهه وجود وإلهه ماهية
......المزيد

العود.. الابدي عند نيتشة (الحلقة السادسة)

نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟
......المزيد

نيتشة والسلطة (الحلقة الخامسة)

-يگول نيتشه : يجب أن يكون الحكم والسلطة بيد الطبقة الارستقراطية
......المزيد

مات الإله.. عند نيتشة (الحلقة الرابعة)

إنتقد نيتشه الدين بصورة عامة ، وإنتقد الدين المسيحي بصورة خاصة ..
......المزيد

نيتشة والمرأة (الحلقة الثالثة)

يگولون : نيتشه چان يكره النسوان كلش ، ويموت منهن ، إلى درجة إنو فد مرة گال عن النسوان :
......المزيد