العود.. الابدي عند نيتشة (الحلقة السادسة)

  • 27 - 07 - 2021
  • 27792
نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟

 


-

-تفترض فكرة "العود الأبدي" أن الكون والإنسان وكل الأشياء سيعاد خلقها من جديد بعد موتها وفنائها ، وهذه الدورة الحياتية ليست هي النهاية ؛ إذ ستعقبها دورات مشابهة لها والى الأبد ..

-شلون يعني ؟

-يعني كل شي يروح ويموت وينتهي ، راح يرجع مرة ثانية بوقت معين نفس ماچان بالضبط ، يعني ماكو شي ينتهي بالموت والإندثار ، كل شي راح يتكرر مرة ثانية بصورة لا نهائية ..

- يعني ممكن إنو آني عندما أموت ، وره فترة من الزمن راح أرجع نفس شخصيتي ووظيفتي وأهلي وأصدقائي وووالخ ؟

-إي نعم ، راح ترجع وتموت وترجع وتموت ....إلى مالا نهاية ..

-حلو ، هسه وضحت الفكرة ، بس شنو الدليل اللي إعتمد عليه نيتشه بصحة نظريته هاي ؟

-دليله نيتشه هو : إن الكون والمواد والطاقة الموجودة بيه ، لاتخلو من واحد من ثلاثة إحتمالات : 

 

الأول : إن الكون والموجودات اللي بيه راح تزداد ؛ وهذا الإحتمال باطل ؛ لأنو راح نسأل هذا السؤال : هاي الزيادة منين إجت وشنو سببهه ؟ والجواب : ماكو سبب يخلي الكون وموجوداته تزداد ..

-ممكن يكون السبب في هذه الزيادة هو قوة خارج الكون ؛ يعني الله مثلا ؟!

-يگول نيتشه : هنا أنتم راح تدخلونه بالمعجزات ، والمعجزات مجالهه البحث الغيبي الميتافيزيقي مو البحث العلمي التجريبي ، فرجاءا بطلوا هاي السالفة .. 

 

الثاني : إن الكون وموجوداته راح ينقصن ، وهذا الإحتمال أيضا باطل ؛ لأنو الفرضية اللي تگول : ( أن الكون في حالة تناقص) ، فالمفروض حسب هاي النظرية أن مواد الكون الآن خلصت وانتهت ، لأنو الكون كان موجوداً عبر ما لا نهاية له من الزمن ؛ فعلى هذا الكلام لازم يكون الكون قد إنتهى من أمد بعيد .. 

-فعلا ، وهذا القول : ( إن الكون في حالة تناقص ) مخالف لقانون ( مصونية الطاقة ) ، النظرية العلمية اللي تؤكد على أن مجموع القوى الموجودة في الكون هو ثابت ومحدد ..

 

الثالث : هو بقاء الكون وقواه ومواده دون زيادة أو نقصان ، وهو الإحتمال الصحيح اللي ثابت بالطرق العلمية ..

 

-جيد ، وشلون إستدل نيتشه على نظريته من خلال هاي الإحتمالات الثلاثة ؟

-يگول نيتشه : بالنتيجة طلع الكون وموجوداته متناهي ومحدود مهما كان عظيما وكبيرا ، والزمان لانهائي ولامحدود ، فلازم راح يجي يوم من الأيام بعد ما تستنفذ مواد الكون جميع الاشكال والأحوال ، أن ترجع هاي المواد إلى التشكل بنفس الصور القديمة والسابقة ؛ لأنو ماعدهه غيرهه ، هي نفسهه تعيد وتصقل بيهه ..

-مو واضح كلش ؟!

-شوف : إذا عندك عجينة وزنهه كيلو مثلا ، هاي العجينة شگد راح تطلع منهه أشكال ؟ تگدر تطلع منهه مثلا عشرة أشكال ، شكل انسان ، عصفور ، بزون ، واوي ، حصان ...الخ ، هاي العجينة عندما تستنفذ جميع هاي الاشكال شراح تسوي ؟ راح تعيد نفس الأشكال السابقة بالضبط ، لأنو عدهه وقت وزمان مفتوح ، خو ما تگعد و تسكت ؟! فتضل هاي العجينة بين فترة وأخرى تكرر وتعيد إنتاج نفس الأشكال السابقة ؛ لأنو العجينة محدودة والزمان غير محدود ، فتگدر تعتبر العجينة هي الكون وموجوداته ، والزمان لانهائي مفتوح إلى الأبد ..

-رحم الله والديك ، هسه وضحت الفكرة ؛ بس شنو الثمرة من هاي النظرية ؟ أو شنو الآثار والنتائج المترتبة على هاي النظرية ؟

-ووالديك بالرحمة أغاتي ، بالنسبة للنتائج المترتبة على نظرية "العود الابدي" للمرحوم نيتشه ، فيمكن تلخيصها بنقطتين : 

 

النقطة الأولى سلبية : وهي إنو هاي النظرية تعني أنك تفتر بدائرة مسدودة ، تروح تروح تروح وترجع لنفس المكان ، يعني حياتك هاي بحذافيرهه راح تتكرر أكثر من مليارات المرات ؛ بفرحهه وبحزنهه ، بحلوهه وبمرهه ، بضحكاتهه وبدموعهه ...الخ ، هاي الدورة راح تشعر الإنسان بالعبثية من هاي الحياة ..

 

النقطة الثانية إيجابية ، وذلك لسببين : 

 

الأول : إنو عندما تؤمن أنه أكو حياة ثانية بإنتظارك ، هي نسخة طبق الأصل من حياتك الحالية ، راح تفكر وتحاول تغير حياتك للأفضل حتى من ترجع وره چم مليار سنة راح ترجع أفضل؛ فأنت تقوم بصنع قدرك ..

 

الثاني : هاي النظرية بيهه عزاء ومواساة وأمل للناس اللي فقدت ايمانهه بالآخرة والثواب والعقاب ؛ لأنو هاي النظرية تعطيهم أمل ولو ضعيف جدا بأنهم ماراح ينعدمون وره الموت وينتهون إلى الأبد ، هذا الامل راح يساعد الناس على العيش الهانيء المستقر بعض الشيء ..

 

والحمد لله ..

 

الفيلسوف__نيتشه ( الحلقة السادسة)

 

باسم_الشبلاوي


اذا لم تظهر لك التعليقات فأعد تحميل الصفحة (F5)

مواضيع أخرى للناشر

عامل النظافة

جاي أفتر بالسيارة وصادفت بطريقي واحد من عمال النظافة وهو يقوم بعمله في تنظيف الشارع العام، أوقفت السيارة على جانب
......المزيد

إعادة المعدوم... ممكنة لو مستحيلة؟؟؟

-اكو بحث مطروح بين الفلاسفة والمتكلمين (علماء العقائد) ، وهو : هل يمكن ان يعاد الشي المعدوم ام لا يمكن
......المزيد

(البحت)

يسولفون على وحده زعلت ويه رجلها ..راد منها الزلمة يمعودة اتعوذي الشيطان گول ما رضت تبقه ومن الصبح صرت اهديماتها
......المزيد

تجربة سجن ستانفورد

من أغرب التجارب في التاريخ في دراسة أثارت جدلا واسعا،
......المزيد

الوجود.. والماهية ؟؟!!

-كل شي بالدنيا إله جهتين : وجود وماهية ، مثلا السماء إلهه وجود وإلهه ماهية
......المزيد

العود.. الابدي عند نيتشة (الحلقة السادسة)

نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟
......المزيد

نيتشة والسلطة (الحلقة الخامسة)

-يگول نيتشه : يجب أن يكون الحكم والسلطة بيد الطبقة الارستقراطية
......المزيد

مات الإله.. عند نيتشة (الحلقة الرابعة)

إنتقد نيتشه الدين بصورة عامة ، وإنتقد الدين المسيحي بصورة خاصة ..
......المزيد