الوجود.. والماهية ؟؟!!

  • 05 - 10 - 2021
  • 2069
-كل شي بالدنيا إله جهتين : وجود وماهية ، مثلا السماء إلهه وجود وإلهه ماهية

، الشجرة إلهه وجود وإلهه ماهية ، الإنسان إله وجود وإله ماهية ، وهكذا كل شي بالكون إله وجود وإله ماهية ..

-زين هو الوجود شنو تعريفه ومعناه ؟

-يگولون : الوجود ما إله تعريف لانه واضح كلش ، والواضح كلش مانگدر نعرّفه بتعريف معين ..

-شبچت عليّه وكل شي مافتهمت !!

-شوف : اذا ردنه نعرف شي غامض ، لازم يكون التعريف أوضح من هذا الشي الغامض ، مثلا : اذا گلتلك : (شنو معنى الإنسان ؟) راح تجاوبني : (حيوان ناطق) ، هنا عدنه (الانسان ) چان شي غامض ، عرّفنا بشي واضح وهو (الحيوان والناطق ) فالحيوان والناطق أوضح من الإنسان ..

-اها ..يعني قصدك لازم يكون المعرِّف (بالكسر) أوضح من المعرَّف (بالفتح ) ، صحيح ؟

-أي صحيح ، فإذا أردنا أن نعرّف الوجود ، لازم نعرّفه بشي أوضح منه (الوجود ) ، وماكو شي بالدنيه أوضح من الوجود ، فشلون نگدر نعرفه ، اذن الوجود ماله تعريف ..

-حلو ، الماهية شنو معناهه ؟

-الماهية : هي مايقع في جواب ماهو ..

-لا ، هاي هيّه ، افتهمت كلش !! وضّح كلامك بعد اخوك ..

-شوف : اذا گلتلك : (ماهو زيد ؟) راح تگول : (إنسان) ، فالجواب عن هذا السؤال هو ماهية زيد ..

-يعني نگدر نگول : انه الماهية هي بيان لحقيقة وذات الشي ، اللي تميزه عن غيره من الأشياء ؟

-تگدر تگول هيچ ..فكل شي ، إله وجود وإله ماهية ..

-ممكن مثال ؟

-مثلا ، اگولك : ( البيذنجانة موجودة ) ، هاي البيذنجانة إلهه ماهية وهي كونهه بيذنجانة ، يعني لاخيارة ولا عرموطة ولاطماطة ؛ وبنفس الوقت هي موجودة ، وهذا وجودهه عبّرنا عنه بكلمة (موجودة ) ..

-يعني الوجود والماهية شي واحد ، لو شيئين ؟

-من ناحية المفهوم اكو اختلاف ، يعني مفهوم كلمة (البيذنجانة) يختلف عن مفهوم كلمة( موجود ) ؛ ولكن من ناحية المصداق الخارجي والواقعي هما شيء واحد ..البيذنجانة هي نفس وجودها ..

-حلو ، زين الاصالة والواقعية المن ، للوجود لو للماهية ؟

-وضح سؤالك لان ما إفتهمته ..

-يعني هاي البيذنجانة اللي أمامي الآن ؛ هاي مصداق من مصاديق مفهوم الوجود ، لو مصداق من مصاديق الماهية ؟

-بعدني ما اعرف شنو تريد من سؤالك! 

-شوف : يعني منو اللي وجوده واقعي وحقيقي ، ماهية البيذنجانة لو وجود البيذنجانة ؟

-هاااااا افتهمت افتهمت ..اكو عدة آراء بالمسألة : جماعة المشائين يگولون : الأصيل والواقعي هو الوجود ، وجماعة الاشراقيين يگولون :الأصيل والواقعي هو الماهية ..

-شنو معنى أن الوجود هو الواقعي والماهيات اعتبارية ..

-معناه ، أن كل شيء موجود بالكون هو عبارة عن شي واحد وهو الوجود ، والماهيات اشياء موحقيقية ، تقسِم هذا الوجود الواحد الى أقسام وأجزاء ؛ حتى يگدر العقل يستوعبهه ..

-شلون يعني ؟

-مثلا اذا جبنه عجينه معينة ، وسوينه من هاي العجينة شكل مربع، وآخر مثلث، واخر مستطيل .. هنا العجينة الواحدة هي مثال للوجود الواحد ، والمربع والمثلث والمستطيل هي أمثلة للماهيات المتعددة ، فشوف العجينة هي في الواقع واحدة ، ولكن اشكالهه متعددة ، وكذلك الوجود فانه واحد حقيقة ، والماهيات (سماء ، أرض ، إنسان ، نبات ، حجر ...الخ ) هي أشكال متنوعة لهذا الوجود الواحد ..

 

#والحمد لله ..

 

#باسم_الشبلاوي


اذا لم تظهر لك التعليقات فأعد تحميل الصفحة (F5)

مواضيع أخرى للناشر

إعادة المعدوم... ممكنة لو مستحيلة؟؟؟

-اكو بحث مطروح بين الفلاسفة والمتكلمين (علماء العقائد) ، وهو : هل يمكن ان يعاد الشي المعدوم ام لا يمكن
......المزيد

(البحت)

يسولفون على وحده زعلت ويه رجلها ..راد منها الزلمة يمعودة اتعوذي الشيطان گول ما رضت تبقه ومن الصبح صرت اهديماتها
......المزيد

تجربة سجن ستانفورد

من أغرب التجارب في التاريخ في دراسة أثارت جدلا واسعا،
......المزيد

الوجود.. والماهية ؟؟!!

-كل شي بالدنيا إله جهتين : وجود وماهية ، مثلا السماء إلهه وجود وإلهه ماهية
......المزيد

العود.. الابدي عند نيتشة (الحلقة السادسة)

نيتشه عنده فكرة مهمة في فلسفته إسمها "العود الابدي" .. -شتگول هاي الفكرة ؟
......المزيد

نيتشة والسلطة (الحلقة الخامسة)

-يگول نيتشه : يجب أن يكون الحكم والسلطة بيد الطبقة الارستقراطية
......المزيد

مات الإله.. عند نيتشة (الحلقة الرابعة)

إنتقد نيتشه الدين بصورة عامة ، وإنتقد الدين المسيحي بصورة خاصة ..
......المزيد

نيتشة والمرأة (الحلقة الثالثة)

يگولون : نيتشه چان يكره النسوان كلش ، ويموت منهن ، إلى درجة إنو فد مرة گال عن النسوان :
......المزيد