-ليش يسمونه فيلسوف التشاؤم ؟

-لأنه كان يرى أن الحياة مابيهه ذرة خير ، إنما الحياة كلهه شر وآلام وتعاسة ..

-زين ، وهاي اللذات اللي مرات تصيب الإنسان ، والسعادة اللي تغمرنه أحيانا ، مو تتنافه وي رأي شوبنهاور بعدم وجود خير ولذة بالحياة ؟

-يگول شوبنهاور : هاي مولذات حقيقية ؛ هاي عبارة عن إختفاء للآلام أو تخفيف منهه شوية ؛ يعني اللذة هي ذهاب الألم ..

-شلون يعني ؟

-أكو بالدنيه أشياء حقيقية ( ايجابية ) ، وأكو أشياء مو حقيقية وإنما وهمية ( سلبية ) ، الأشياء الحقيقية مثل (الألم) ، والأشياء الوهمية مثل (اللذة) ، فاللي موجود حقيقة وواقعا بالعالم هو الآلام والشر والتعاسة ، وأما اللذات والخير والسعادة ، فهاي أشياء وهمية تظهر نتيجة إختفاء أو تقليل الآلام والشر والتعاسة ..

-اها ..وشنو رأيه بالجنس ؟

-يگول : الجنس هو الدافع الرئيسي اللي نگدر من خلاله ، نفسر جميع تصرفات البشر ، وهو بهذا الشي يتفق وي نظرية (فرويد ) بالدافع الجنسي ..

-زين ، هل شوبنهاور مثالي لو مادي ؟

-شوبنهاور إنسان مادي ، يگول : ماكو شي بالوجود غير المادة ..

-أكو عنده عبارة : (الإرادة الكلية للطبيعة ) ، شنو يقصد بيهه ؟

-يگول : إن الطبيعة تمتلك إرادة مثل إرادة الإنسان ؛ يعني تريد بعض الأمور ، وترفض بعض الأمور ، هاي الإرادة كلية وعامة وأساسية للطبيعة ؛ يعني الطبيعة ماعدهه شي مهم ويستاهل ، غير هاي الإرادة ..

-وشنو هاي الإرادة الكلية ، يعني الطبيعة شتريد بالضبط ؟

-المهمة الأساسية للطبيعة هي الحفاظ على بقاء الأنواع ؛ يعني الطبيعة تريد أن تحافظ على النوع البشري والنوع الحيواني والنوع النباتي ..

-شلون تحافظ عليهم ؟

-الطبيعة عدهه طلابة قديمة وي الموت ، الموت يريد يقضي على الحياة والأحياء ، والطبيعة ماتخليه يحقق هدفه ، الموت يومية ماخذله روح إنسان لو حيوان لو نبات ، والطبيعة واگفتله بالمرصاد ، وتگوله : يموت واحد من ربعي يجي الف ، رووح اذا ماتكفي إيديك حط رجليك ? .. 

-وشلون گدرت الطبيعة تحافظ على الحياة والأحياء ؟

-گدرت تحافظ عليهم من خلال الجنس ، هاي الغريزة الرهيبة ، اللي تخلي كل حي يمارسهه غصبا ع الخلفوه ، وبالتالي راح تكون هاي الغريزة هي سبب للتوالد والتكاثر للأحياء ، واللي تعوض الطبيعة بيه مافقدته بسبب الموت ..

-عجيب ..زين شنو رأيه بالحياة ؟

-يگول : الحياة تافهه ومريرة ، ولازم الإنسان ينتحر حتى يتخلص من الألم ، ويگول : الموت مايخوف ، وهاي الناس اللي تخاف من الموت مشتبهين ، هم يخافون من فكرة الموت ، مو من نفس الموت ، تصور الموت يخوف ، بس بالحقيقة الموت مابيه ألم ولاضرر ، بالعكس ، الموت كلش مفيد حتى نخلي حد لآلامنا وتعاستنا ..

-انا خووووك ..لك هذا شجاي يحچي ، هذا مبين عليه إنسان ملحد مايؤمن بوجود الله ، ولا بالجنة أو النار !! ماعلينه بيه ، بس گولي : شنو سبب فلسفته هاي اللي كلهه تشاؤم وكآبة ؟

-يگولون : بسبب حياته وظروفه اللي چان بيهه خطية ، لأن ابوه إنتحر وهو عمره 17 سنة ، وهذا الشي سببله صدمة نفسية چبيرة ، بعدين راح لأمه بلكي يلگه عدهه الحنية والأمان ؛ بس مع الأسف طلعت أمه مو خوش مره ، بعده الأربعين مال رجلهه ماطالع ، گامت تمشي بطريق الحرام والسرسرة بت الاوادم ? ، وهذا الشي دمر نفسية فيلسوفنه ، فكره النسوان وكره طاريهن ، حتى يگولون : إنه مات وهو لا متزوج ولا مسوي علاقة وي أي مره ..

كل هاي المآسي وتريده مايتشائم ..

والحمد لله ..

الفيلسوف_شوبنهاور ( الحلقة الأولى )

باسم_الشبلاوي