أولا : تكلمنا في الحلقة الماضية عن "إرادة الحياة" ، وقلنا أن هذه الإرادة ( التي هي بمثابة "الله" عند شوبنهاور ) تريد الحياة وتسعى إليها وتحاول أن تتخلص قدر الإمكان من الموت ..

-وشلون تگدر الإرادة ( الله ) تتخلص من الموت ؟

- الإرادة لگتلهه طريقة ناجحة جدا للتخلص من الموت ، وهاي الطريقة هي "التناسل" ، فعن طريق التناسل بين الكائنات الحية راح تستمر الحياة وتتخلص الإرادة ( الله ) من الموت ..

ثانيا : هذا التناسل بالرغم مما يتضمنه من عناء وتعب للكائن الحي ؛ إلا أنه كل كائن حي يسارع إلى التناسل بالرغم من ذلك ، فتشوف مثلا فحل العنكبوت وره مايلقح النثية مالته تاكله نثيته ، والزنبور اللي يگضي حياته يجمع قوت لصغاره الذين لن يراهم ابدا ، والإنسان اللي يكد ويتعب علمود جهاله ، ويضيع شبابه وصحته لأجلهم ، كل هذا لأجل شيء واحد : إستمرار النسل ، وبالتالي إستمرار الحياة ..

ثالثا : إذن التناسل هو الهدف الرئيسي لكل كائن حي ، وهو اقوى الغرائز ؛ لأنه الشيء الوحيد اللي يگدر يقهر الموت وينتصر عليه ..

رابعا : الإرادة ( الله ) حتى تضمن سلامتهه من خطر الموت شسوت ؟ ماخلت إرادة النسل والجنس بيد العقل ؛ لأنو العقل بطبيعته يفكر ويحلل ويدقق ، وبالتالي ممكن أن يرفض العقل الزواج والجنس لأنو الزواج بيه مشاكل هواي ..

-چا شسوت الإرادة ؟

-جعلت الإرادة النسل والجنس تحت قيادتهه مباشرة ؛ يعني اللي يتحكم بالجنس هو الإرادة والغريزة وليس العقل ؛ ولذلك تشوف حتى الفلاسفة ماگدروا يسيطرون على غريزة الجنس ، ليش ؟ لأنو الإرادة ماخلت الجنس تحت قيادة العقل ، وإنما خلته تحت قيادتهه ..

خامسا : أعضاء التناسل هي أساس الحياة ؛ لأنها تحتوي على حياة لا حدود لها ؛ ولذلك قديما بعض الأقوام كاليهود واليونان عبدو الأعضاء التناسلية ..

سادسا : العلاقة الجنسية بين الذكر والأنثى هي أساس كل شيء ، هي السبب في الحرب والسلام ، وهي السبب في الجد والمزاح ، هي سبب كل نكتة ، هي سبب كل تلميح ، هي سبب كل عبارة غامضة ، بعبارة أخرى : الجنس هو كل شيء في حياتنا ..

سابعا : مهما حاولنا ان نكبت ميولنا الجنسية أو نقتلعهه من الجذور ، راح تفشل كل محاولاتنا ، فإذا غطيناهه عن أعين الناس وإدعينا إنو إحنه ملائكة أطهار ، راح تبلش بينه بخلواتنه وتطلع بينه القضه والمضه ؛ لأنو الجنس هو أساس الحياة ، فلاحياة بدون جنس ، والإرادة ( الله ) يريد الحياة من خلال طريق الجنس ، ولذلك فمحاولة قمع الجنس وكبته ماراح تفيد ؛ بالعكس راح تخليه يزيد ما ينقص ..

ثامنا : كل كائن حي وخصوصا الإنسان يبحث في الشريك الزوجي عن صفات الكمال اللي ماموجودة عنده ؛ حتى يكمل نقصه ..

- مو واضح ؟!

- يعني مثلا الرجل القصير يدور على مرأة طويلة حتى يسد النقص اللي بيه ، والمرأة السوداء تدور ع الرجل الابيض حتى تسد النقص اللي بيهه ، السمين يدور ضعيفة ، والجاهل يدور مثقفة ، والفقيرة تدور غني ، والجبان يدور على إمرأة شجاعة ، والمريض يدور على وحدة صاحية وهكذا ، فكل شخص يبحث في الشخص الآخر عن صفات الكمال اللي مامتوفرة عنده ويحاول يسد نقصه بيهه ..

-عود ليش كل واحد يدور ع الصفات اللي تنقصه ؟

-الامر مو بيده ؛ وإنما الأمر بيد الارادة ( الله ) هي اللي تخلي كل واحد يدور ع الصفات الجيدة بالشريك ؛ لكي يكون النوع الانساني ممتازا وجيدا وليس ناقصا أو مريضا ..

تاسعا : أفضل فترات ممارسة الجنس هي فترة الشباب ؛ ولذلك فالشباب إلهم جاذبيتهم حتى لو كانو قبيحين ، بينما لاجاذبية للشياب حتى لو كانو جميلين ..

عاشرا : أفضل أنواع الزواج هو الزواج اللي يجي عن طريق اختيار الاب والام ( الزواج التقليدي ) ، وأسوأ انواع الزواج هو الزواج اللي يجي عن طريق الحب ..

-ليش ؟

- لأنو الزواج اللي يجي عن طريق الحب راح يخدم النوع أكثر من الفرد ؛ يعني النوع الإنساني بصورة عامة هو اللي يستفيد من مثل هيچ زواج قائم على الحب ، بينما نفس الشخصين المتزوجين ماراح يستفيدون هواي ؛ لأنهم سوف يكونون مجرد وقود لنار النوع الانساني ، واضح ؟

-واضح ..

-وأما الزواج التقليدي فبالعكس ، ماراح يتعبون الزوجين بيه هواي ؛ لأنه زواج مابيه حب ، وبالتالي ماكو جنس هواي ، وإذا ماكو جنس هواي راح يبقى الزوجين محتفظين بصحتهم ، واللي راح يخسر النوع الانساني فقط ..

أحد عشر : مادام الجنس مجرد خدعة تدبرهه الارادة ( الله ) لزيادة النسل ، فأحسن شي هو عدم الوقوع في شراك هذه الخدعة ، ويجب عدم الزواج نهائيا ، أو على الأقل الزواج بشكل تقليدي ..

إثنا عشر : من الأدلة على كون الكائن الحي مجرد أداة بيد الجنس والإرادة هو أن حيوية الفرد تعتمد على خلاياه التناسلية ..

-شلون يعني ؟

-يعني الشخص اللي مايمارس الجنس نهائيا مثل "الخصي" ، هذا الشخص راح يكون أقرب إلى الموت ، والشخص اللي يمارس الجنس زيادة عن اللزوم همينه راح تضعف قواه ، وبالتالي يقترب من الموت ، وأما اللي يمارس الجنس بإعتدال فراح تزيد قواه ويطول عمره ..

- شنو معنى هذا الكلام ؟

-معناه إنو الجنس مخلينه أدوات لتنفيذ هدفه ( اللي هوه إستمرار الحياة ) ، فإذا ضعفت هاي الاداة ( الإنسان ) وماگدرت تمارس الجنس ، راح تنرگع ميت چلاق وتموت ..

والحمد لله ..

الفيلسوف_شوبنهاور ( الحلقة الرابعة )

باسم_الشبلاوي