الفن عند شوبنهاور (الحلقة الثامنة)
أولا : الفن هو حالة تكون عند الإنسان تحرر المعرفة عنده من الخضوع للإرادة ، وتخليه ينسى نفسه ومصالحه الشخصية ، وتجعل عقله يتأمل ويفكر في الحقائق فقط ..
ثانيا : الفرق بين العلم والفن هو أن موضوع العلم هو "الكلي" اللي يتضمن أشياء كثيرة ، بينما موضوع الفن بالعكس ، هو الجزئي اللي يشمل الكلي ..
-شلون يعني ؟
-يعني مثلا موضوع علم الطب هو الكلي ( اللي هوه جسم الإنسان ) المتضمن أشياء كثيرة ( يعني جسم الإنسان اللي هوه كلي ، يحتوي على أشياء كثيرة مثل القلب والكبد والرئتين وغيرها ) ، فهنا يكون موضوع العلم الرئيسي هو الكلي ( الجسم ) وليس الأجزاء ( القلب والكبد وغيرها ) ، بالك يمي ؟
-نعم ..
-بينما موضوع الفن بالعكس ؛ يعني موضوع الفن هو الشيء الجزئي ؛ ولكن هذا الشيء الجزئي يشير إلى الكلي ..
-شلون ؟
-يعني مثلا فن الرسم ، فإذا أراد الرسام أن يرسم صورة رجل ، فلازم يخلي هذا الرسام أغلب الصفات العامة للإنسانية في صورة هذا الرجل ؛ يعني كون الرسام مايركز على التفاصيل الجزئية لهذا الرجل ؛ وإنما لازم يخلي قدر الإمكان جميع صفات الإنسانية العامة في صورة هذا الرجل ، بحيث إذا نظرت إلى صورة هذا الرجل كأنما جاي تنظر إلى الإنسانية ككل ..
ثالثا : الفن أعظم من العلم ؛ لأن العلم يصل إلى النتائج بصورة بطيئة جدا ؛ يعني العالم يبحث ويدقق ويحقق ويتأنى ويقارن ويجمع الملاحظات وووالخ ، وبعدين يوصل إلى نتيجة معينة ، بينما الفن يصل إلى النتائج بصورة أسرع واسلس ؛ يعني مثلا الشاعر ساعة الساعة يجيه إلهام وتنفتح قريحته الشعرية ، فيطلعلنه خلال ساعات أعظم القصائد ، فهنا الفنان ( الشاعر ) توصل إلى النتائج ( القصيدة ) بصورة أسرع من العالم ..
رابعا : العلم تكفيه الموهبة العادية ( المكتسبة ) ؛ يعني أي إنسان تقريبا إذا درس وإجتهد وتعب على روحه ، فممكن يصير عالم من العلماء ، وأما الفن فلا تكفيه الموهبة العادية ، وإنما لازم الفنان تكون عنده موهبة ربانية ( غير مكتسبة ) ؛ يعني كل واحد يگدر يصير دكتور أو مهندس ؛ بس مو كل واحد يگدر يصير شاعر أو رسام ..
خامسا : السبب في استمتاعنا بالفن كالشعر والموسيقى والرسم وغيرها ، هو أننا نتأمل في حقيقة الشيء الفني بدون مانسقط عليه خيالاتنا وأوهامنا ؛ مثلا عندما تسمع مقطوعة موسيقية ، فإنك تندمج مع حقيقة هاي المقطوعة الموسيقية ، بعبارة أخرى : تتأمل الموسيقى وتسمعها بقلبك وليس بعقلك وأفكارك ؛ يعني تعيش وياهه وماتضل تحلل بيهه فكريا ..
سادسا : حتى الأشياء القبيحة في ظاهرهه ، إذا تأملناهه جيدا بدون النظر إلى ضررنا منها ، راح نشوفهه جميلة جدا ؛ يعني مثلا العقرب شكله مقزز وقبيح ومخيف ؛ ولكن إذا نظرنا إلى التناسق الموجود في خلقة العقرب ، وإنسجام أجزاء جسمه ، ودقة وظائفه الحيوية الداخلية ، وننسى شوية إنو العقرب مضر بالنسبة إلنه ، فراح نشوف العقرب كلش حلو وجميل ..
سابعا : الفن يخفف من ضغوطات الحياة ؛ لأنه يرينا الجوهر الحقيقي للأشياء ، هذا الجوهر المتصف بالدوام والبقاء ، واللي هوه عكس الأعراض الموجودة بالدنيا ، فإنها زائلة وفانية ؛ فالفن يخلينه نرتاح شوية ومانخاف من صعوبات الحياة كالمرض والفقر والموت وغيرها ؛ لأنها زائلة وفانية ..
ثامنا : أفضل أنواع الفنون هو الموسيقى ؛ لأن الموسيقى تتحدث عن حقيقة الأشياء ، وأما بقية الفنون فإنها تتحدث عن قشور الأشياء وظواهرها ، والموسيقى تؤثر فينا تأثيرا مباشرا وفعالا ؛ لأنها تخاطب فينا جانب القلب لا العقل ..
والحمد لله ..
الفيلسوف_شوبنهاور ( الحلقة الثامنة )
باسم_الشبلاوي